Maisebber
Ssssst peng - een Maisebber is gegen de Fensterschiev brummt - nu kümmt de twete - sssst peng - beide liggt op ‘n Rüüch op de Fensterbank. De Schoolmeister Richard Dall deit, as wenn he nix markt hett un verkloort de Kinner de Perzentreknung wieder. Twee sind to wenig,
denkt he. Aver dor kummt noch twee ansuusen, quer dörch de Klasse. De Kinner höört all nich mehr to. Hest du noch mehr in dien Zigarrnkist?
froogt he den Übeltäter, de sik achter den Rüüch von sienen Macker versteken deit. De Schoolmeister geiht hin un mookt de Kist op. Dor krabbelt noch eenige in rüm. Fangt de annern wedder in.
Mit Hallo geiht de Joogeree los, bit se all wedder in de Kist sind.
He nemmt de Kist in de Hand un sett sik twüschen de Kinner. Nu mookt he de Kist op, dat de Kinner all rinkieken könnt. Un nu geiht dat Strieden los: Dat is een Bäcker, dat een Schosteenfeger, de dor een Müller un wat dat sünst noch för Sorten gifft. De Lehrer lett nich locker. He froogt no de Tieroort, no den Chitinpanzer, no de Föhlers, no de Hoken an de Been, woto de sind. Worüm twee Sorten Flünken, worüm nickt de Maisebber mit’n Kopp? - He mutt eerst telln, sünst kann he nich losfleegen!
seggt een ganz Klooken.
Is dat een nützlichet Deert, wo kümmt he her, wie lang liggt de Engerling, de Larv von den Maisebber, in de Eer?
De Kinner markt gor nich, dat se mit’n Mol een Biologiestünn hebbt. Mit Iever
sind se all dorbi. De Stünn is veel to kott, dat gifft so veel to vertell'n von de Maisebbers. As dat bimmelt seggt de Schoolmeister Schoolarbeit is een Oppsatz över den Maisebber!
Jedes Johr is dat so. De Schoolmeister töövt bloß den richtigen Moment aff. Dor sünd jümmers ‘n poor Jungs, de em argern wöllt mit Maisebbers. He weet dat, he is sülven dormit rinfulln, as he ‘n dummen Jung weer, seggt mien Vadder, denn dat weer disse Schoolmeister…